اتحاد الشغل يُنظّم يوما في العاصمة تحت مُسمى .. “انتصارا لكرامة المربي”

وقال الطبوبي:” أهم مخرجات الهيئة الإدارية الوطنية أنو في ظل تعطل الحوار، وفي ظل استهداف الاتحاد العام التونسي للشغل في التضييق على الحريات النقابية والحريات العامة والفردية، لأن الاتحاد ليس بمنظمة حرفية متاع مطالبة بتعديل المقدرة الشرائية فحسب، بل حتى في تعريفها في القانون الأساسي، هي منظمة وطنية توازن بين دورها الاجتماعي ودورها الوطني، فيما يتعلق بوضعية التعليم الأساسي هناك تحركات نضالية على مستوى الجهات، وهناك يوم سيحدد قبل نهاية الشهر، سنميه انتصارا لكرامة المربي، بش يكون في تونس العاصمة، التعليم الأساسي، وبش يتكرس فيه مبدأ التضامن النقابي مع بقية القطاعات، كذلك الهيئة الإدارية بقات في حالة انعقاد وستتخذ على ضوء التطورات قرارات نضالية وطنية في مجمل القضايا، لأنو اليوم أحنا دعاة حوار مسؤول، وماذابينا ما حاجتناش بالتوترات الاجتماعية، حاجتنا بإيجاد الحلول، وفي الآخر مهما كانت التوترات ما تتحل المشاكل إلا بالجلوس على طاولة الحوار، وهذا اللي فيه مصلحة التلامذة وفيه مصلحة المربيات والمربين، الهروب إلى الأمام ما يقابلو إلا التعنت اللي ما يجيبش حتى نتيجة، اليوم فما الحكمة وفما العقل يلزم يتكرسوا من أجل المربيات والمربين، كي نقولوا على قيمتهم المعنوية والأدبية يلزم نترجموها بالملموس، وكي نقولو مصلحة التلامذة كيف كيف يلزم نترجموها بالملموس، يزي مالشعارات ويزي مالكلام متاع الاتهامات والمصطلحات اللي ما تليقش بوزارة التربية أني تقول جريمة وتقول مغامرين، هذا لا يليق بوزارة التربية اللي تشرف على القطاع التربوي اللي ينمي وعي المجتمع… بطبيعة الحال قرار حجب الأجور قرار تعسفي وجائر ومتاع تجويع ولا سند قانوني ليه”…